Kort fortalt:
- Før ein kan bygga/gjera tiltak på ein eigedom må ein sjekka kva reglar som gjeld. I mange tilfelle er det ein reguleringsplan (detaljplan) som gir desse føringane.
- Under finn du ein illustrasjon av dei ulike fasane som skjer, når ein ny reguleringsplan vert til, og korleis du som nabo/part kan påverka prosessen og utfallet.
- Det kan også skje endringar i eksisterande planar (planendringar) som du som nabo/part kan uttala deg om. Under finn du også ei kort forklaring på forskjellen i desse prosessane, og kva dei betyr for deg.
- Det fins også ei forklaring på kva som skjer når ei sak har felles saksbehandling mellom ei byggesak-søknad og ein planprosess (parallell behandling). Denne metoden har eit annleis løp og andre fristar enn elles.
- Her finn du også det du treng av informasjon for å kunna fremja ein plan i Time kommune.
Oversikt over planprosessen
Denne omtalen gjeld for nye reguleringsplanar.
Naboar
Som innbyggar i kommunen kan du brått måtte stilla deg til eit pågåande planarbeid. Dokumentet for planprosess gjev eit kjapt oversyn over korleis ein planprosess føregår frå start til slutt, og i kva fasar du som innbyggjar kan koma med dine innspel. Dokumentet for fasebeskriving gjev ei meir detaljert utgreiing av dei fasane planprosessen inneheld, og kva konsekvensar dei har for deg.
For endring av eksisterande planar (planendring) gjeld ein anna og litt forenkla prosess. Sjå omtalen av forskjellar under. Ved krav om planprogram og konsekvensutreiing vil dette skje i ein eigen prosess før ein går vidare til neste fase i planprosessen (fase 2) Dette vil då stå omtalt i oppstartsvarselet.
Kva er forskjellen mellom planprosess og planendring?
Ein planprosses gjeld etablering av ein ny reguleringsplan. Då gjeld alle krav og heile planprosessløpet.
Ved ei planendring endrar ein ikkje på hovudgrepa i eksisterande plan, og plankrava gjeld ikkje fullt ut her. Det vil seia at det er mindre krav til dokumentasjon og mindre endringar som vil verta synlege i plandokumenta. Ofte er det anten berre plankartet eller berre føresegnene som vert endra. Det vil truleg og vera andre/færre partar som vil verta rekna som nabo/part i desse tilfella, men fristar til innspel, merknadar og klagerett vil vera like. Det vil stå i varselet som du mottek, om det er ei endring eller ein ny plan. Den same forskjellen vil du finna igjen på kommunen sine informasjonssider. Sjå dokumentet om Begrepsforståing (PDF, 156 kB) om det er ord eller uttrykk som er uklare.
Kva er ei parallell behandling/felles behandling?
I nokre tilfelle vel ein å kjøra ei felles behandling for plan- og byggesaksprosessen. Dette vil i så fall verta avklart under oppstartsmøte til planprosessen og omtalt under «varsel om oppstart». Dine innspel/merknadar som nabo/part vil då gjelda i begge sakene. Det vert gjort to vedtak, eit for planen og eit for byggesaka, jf § 12-15 pbl. Felles kontaktperson vil vera ein representant frå planseksjonen. Formelt må planen vedtas før det kan gis byggetillatelse. Fordelen med parallellbehandling er at ein får meir informasjon om kva tiltak som skal byggast allereie i planprosessen, samtidig som ein sparar tid ved at byggesøknaden vert behandla samtidig og ikkje etter at planprosesssen er ferdig. Byggesøknaden vil då ta lengre enn dei vanlige 12 vekene, då han vil følgja fristane til plansaka. Du som nabo/part vil likevel ha same moglegheit for medverknad og klagerett som du ville hatt om dei vart kjøyrde uavhenging av kvarandre.
Planprosessbeskriving ved parallellbehandling (PDF, 224 kB).