Husleigetilskot til lag og organisasjonar
Søknad
Søknad om husleigetilskot skal sendast Time kommune, post@time.kommune.no, og må innehalda opplysningar om arrangementet, samla leigeutgifter (jf. retningslinjene for husleigetilskot), kontaktinformasjon om søkjar og kontonummer.
Retningsliner for husleigetilskot
1. Formål
Ordninga skal gjera det mogleg for det lokale kulturlivet å bruka kulturhuset Storstova som arena for sine kulturarrangement. Dette skal gje eit meir mangfaldig og rikare kulturtilbod lokalt.
2. Kven kan søkja?
Frivillige kulturorganisasjonar og andre ikkje-kommersielle organisasjonar med fast verksemd i Time kommune. Foreiningar og organisasjonar av regional karakter eller som er fylkeslag fell utanom ordninga.
3. Kva kan det søkjast om tilskot til? Grunnlag og ramme for tilskotet
a) Det kan søkjast om tilskot til konsertar, teaterførestillingar, danseførestillingar, andre sceneproduksjonar, litteraturarrangement, andre typar kulturarrangement samt møte.
b) Arrangement som vert innvilga støtte skal vera opne for alle.
c) Det kan søkjast om tilskot for inntil 40 prosent av leigeutgiftene, likevel ikkje meir enn 30 000 kroner per arrangement.
d) Leigeutgiftene omfattar leige av sal inkl. utstyr som er på huset, husvert og publikumsvert. Prisane for leige av Storstova vert årleg fastsett av kommunestyret ved behandlinga av økonomiplanen.
4. Økonomisk ramme
Disponibel ramme for tildeling av husleigetilskot vert årleg fastsett av kommunestyret ved behandlinga av økonomiplanen.
5. Behandling av søknader
Søknader om husleigetilskot vert fortløpande behandla av kulturverksemda i Time kommune.