Her ligg steinen som etter planen skal brukast i den delen av Storgata som skal stå ferdig i løpet av sommaren. Are M. Heiseldal

På ein parkeringsplass på Bryne ligg store mengder stein som er berekna på å brukast til oppussingsprosjektet i Storgata. Viss kommunestyret 18. mars følger opp vedtaket i formannskapet startar arbeidet meir eller mindre på dagen.

– Me er klare til å setta i gang så fort me får klarsignal. Gjev kommunestyret grønt lys satsar me på at denne biten av Storgata skal stå ferdig samtidig som strekninga frå torget og fram til gangbrua over Arne Garborgs veg, seier Ole Bjørn Maråk, plan- og utbyggingssjef i Time kommune.

I så fall vil framdriftsplanen vera som følger:

Strekninga Jernbanevegen – Torget: Ferdig til Jærnåttå, 28. mai (dette er nytt)
Strekninga Torget – Erlandsbakken: Ferdig til Jærnåttå, 28. mai
Strekninga Erlandsbakken – vestenden av Jær:Bu: Ferdig til fellesferien, 6. juli
Strekninga frå vestenden av JærBu til Reevegen: Ligg inne i budsjetta for 2027-28

Dei steingalne velgjerarane

Det er Brynes Vel, Jærdagen/Jærnåttå, Jæren Sparebank og Bryne næringsforening som står bak gåva til kommunen. Avtalen kommunestyret skal stemma over 18. mars er om denne grupperinga skal få betala halvparten av kostnaden for steinen, mens kommunen tek den andre halvparten. Vel kommunestyret å seia nei vil steinen, som allereie er innkjøpt, verta brukt lenger nede i Storgata seinare i staden for strekninga mellom Jernbanevegen og torget.

Denne vesle stubben, mellom Jernbanegata og torget, kan nå verta ferdig kjappare enn fyrst planlagd. Are M. Heiseldal

– Me ønsker å vera ein bidragsyter i sentrum og legga til rette for byutvikling, og akkurat denne delen av Storgata bruker me jo spesifikt i samband med Jærdagen og Jærnåttå og andre festivalar. Derfor er det naturleg at me er med å bidra, seier Kenneth Lia, leiar i Bryne Næringsforening, på vegner av gruppa som hjelper med finansieringa. Lia legg til at timinga var viktig:

– Nå som fylkeskommunen er i gang med Jernbanevegen fekk heile dette prosjektet såpass med driv at me følte det var synd om sjølve inngangsporten til Bryne skulle ramla litt mellom to stolar. Nå kan forhåpentlegvis heile Storgata-prosjektet verta ferdig litt fortare.

Her mellom torget og Jær:Bu skal kommunen legga stein, planta tre og setta opp ny gatebelysning før strekninga vert opna 28. mai. Are M. Heiseldal

Strekninga på biletet over, fram til Erlandsbakken og gangbrua over mot Hotell Jæren, skal altså etter planen stå ferdig til Jærnåttå i slutten av mai, og same dato siktar kommunen seg inn på å ha den nyfinansierte stubben mellom Jernbanegata og torget klar til bruk. Som ein ser på biletet er det tatt ned enkelte tre i Storgata i samband med arbeidet, og desse trea vil verta planta på nytt, i tillegg til at det skal installerast ny gatebelysning.

Jær:Bu tek form, og det gjer etter kvart Storgata utanfor bygget òg. Denne biten skal stå ferdig til fellesferien. Are M. Heiseldal