Frå venstre Synnøve Salte (leiar, Nasjonalforeningen Jæren Demensforening), Olaug Kvalstad (dagleg leiar fylkeskontoret for Rogaland, Nasjonalforeningen for folkehelsen), Gro Iren Kristensen, Jeanette Johansson, Renate Iversen (avdelingsleiar), Reidun Haugland, Torbjørg Undheim Johannessen, Hanne Kringlebotten Ree, Anne Opstad Haugland og Hanne Eik (fylkesleiar Rogaland, Nasjonalforeningen for folkehelsen). Are M. Heiseldal

“1. etg Nord ved Bryneheimen er eit lysande eksempel på korleis ein offentleg institusjon kan kombinera fagleg kvalitet, engasjement og varme i demensomsorgen,” står det i foreninga si grunngjeving for prisen.

Tysdag føremiddag var dei tilsette samla til avdelingsmøte, men mens dei satt samla troppa verksemdleiar Bylgja Hrönn Ingvadottir i Time kommune opp saman med demenskoordinator Bente Dagmar Lura og tre hemmeligheitsfulle og raudkledde damer: Synnøve Salte, leiar i Nasjonalforeningen Jæren Demensforening, Olaug Kvalstad, dagleg leiar fylkeskontoret for Rogaland, Nasjonalforeningen for folkehelsen, og Hanne Eik, fylkesleiar i same forening. Sistnemnde las vidare frå grunngjevinga:

Mens dei tilsette sit i det dei trur er eit avdelingsmøte kjem prisutdelarane inn i rommet på Bryneheimen med dagens store overrasking. Are M. Heiseldal

– Grunngjevinga for å tildela årets pris til 1. etg. Nord, Bryneheimen er at i ei tid der media har hatt mykje fokus på avvik og negative sider ved eldreomsorga vil me løfta fram ei avdeling kor demensomsorga fungerer bra ut ifrå dei ressursane avdelinga disponerer. Ei eining som utmerker seg med eit sterkt fagleg engasjement, personsentrert omsorg og nytenkande tiltak som har stor verdi for personar med demens og deira pårørende.

Overraska tilsette

Prisen kom som lyn frå klar himmel for dei tilsette.

– Me så ikkje dette komma! Eg kjenner at det betyr meir enn eg hadde trudd det skulle gjera. Ein får ei bekrefting på jobben ein gjer, og det er ikkje så ofte det skjer. Me brenn jo for dette, og ein sånn pris gjev jo ein ny boost i jobben, seier Hanne Kringlebotten Ree, som jobbar på avdelinga, og får støtte frå kollega Torbjørg Undheim Johannessen:

– Det er rørande. Og så er det veldig fint å høyra at det ein gjer betyr noko, så det var både veldig stort og overraskande. Me er jo ei veldig bra avdeling, me har det godt på jobb og er ei fantastisk gruppe, men eg hadde ikkje venta det og er framleis litt sjokkert!

At anerkjenning er viktig understreker òg kommunen sin demenskoordinator.

Skryt for jobben!

Her innser overraska tilsette at dei har fått demensprisen for 2025. Are M. Heiseldal

– Dei tilsette står dagleg i utfordrande situasjonar som omfatter både pasientar og pårørande, og vert ikkje alltid sett. Eg håpar dette kjennest som skryt for den jobben dei gjer, seier Bente Dagmar Lura.

Kvart fylkeslag i Nasjonalforeningen for folkehelsen kan dela ut demensprisen ein gong i året til ein enkeltperson, ei gruppe menneske eller ei eining, for ein innsats utanom det vanlege. Det var Jæren demensforening som nominerte avdelinga ved Bryneheimen.

– Og det gjorde me fordi dei verkeleg fortener det. Det er viktig med positiv omtale i eldreomsorgen, og ikkje berre dei negative oppslaga vi ofte ser. Skal me få folk til å jobba i eldreomsorga framover treng me å anerkjenna jobben som gjerast og heia fram dei som gjer han, seier leiar Synnøve Salte i Jæren demensforening.

Me gratulerer avdelinga ved Bryneheimen med prisen. Vel fortent!

Fylkesleiar for Nasjonalforeningen for folkehelsen i Rogaland, Hanne Eik (til venstre) deler ut bilete og blomar til avdelingsleiar Renate Iversen (i midten) og tilsett Jeanette Johansson. Are M. Heiseldal