Ti turar i Time 2024: Tur 2, Lauvlia Jan Oskar Haugen

Ti turar i Time 2024: Tur 2, Lauvlia, startskilt Jan Oskar Haugen

Lauvlia

Fottur, totalt 6 km, tur/retur, middels
Total stigning 154 m

Tilkomst

Følg fv. 201, Sikvalandvegen, frå Undheim mot Tjåland. Turen startar ved parkeringsplass like før Snorestad, same p-plass som for turen til Skårlandskula. Det er skilta til p-plass frå krysset ved Tjåland bedehus. Vante turgåarar vil kanskje hugse at p-plassen er liten, men etter ei oppgradering i 2023 har han nå plass til om lag 20 bilar. QR-koden står ved starten av løypa, ved porten om lag 20 meter frå p-plassen.

Ti turar i Time 2024: Tur 2, Lauvlia, målskilt Jan Oskar Haugen

Turinformasjon

Frå p-plassen følger du skilt og raudmerka pålar. Turen går først gjennom ei grind og over innmark, før den går vidare på traktorveg fram til Lauvlia. Turen følger i starten same trase som til Skårlandskula. Lauvlia er ein nedlagt husmannsplass, og du ser ei raudbrun hytte når du er komen fram. QR-koden for registrering av turen står lett synleg på skilt
ved Lauvlia.

Turen kan forlengast til Skogen på merka sti.

Påminningar

Her og der kan det vera husdyr på beite. Derfor legg me til fem små, men viktige påminningar for at alle skal ha glede av turtilbodet:

• Vis omsyn når du parkerer, slik at du ikkje blokkerer vegen for andre
• Respekter bandtvangen
• Lukk eventuelle grindar
• Ta avfallet med heim
• Følg kuvett-reglane viss du møter kyr når du er ute på tur