Peter Braut, vernepleier, heimesjukepleia sone vest

Eg jobbar i heimesjukepleia sone vest, eller "Ville Vesten", som me kallar det. For ein veit aldri heilt kva ein møter i denne jobben, og det er noko av det eg likar best med han. Av og til er det fullt kaos, men det kjekke er at me er saman om det her i Ville Vesten. 

Eg likar at jobben krev at eg er veldig fleksibel. Det vert aldri einsformig, og ein får jobba med heile mennesket. Og så likar eg at det ikkje er noko hierarki her. Eg får lov å vera vernepleiar, ikkje berre "light-sjukepleiar".

På Bryneheimen får eg øvd meg på det faglege og føler eg utviklar meg i jobben. Med årsturnus er arbeidstida veldig fin, og eg kan koma med ønskje om korleis eg vil jobba. Viss eg vil ha meir helge- eller kveldsvakter er det greitt, vil eg jobba ekstra er det alltid vakter å få, og vil eg ha litt meir fritid kan eg få det. Og arbeidsmiljøet er topp. Eg har kollegaer med mange ulike utdanningar - sjukepleiarar, assistentar, legar, frisørar - og alle jobbar godt i team.

Leveregelen til Time kommune er "Me skal gjera kvarandre gode." Den bodskapen likar eg veldig godt, og sånn er det faktisk: Me gjer kvarandre gode. Eg trur ikkje det er nokon som jobbar her på Bryneheimen som ikkje trivst.

Jørgen Bønke, ergoterapeut, ambulant rehabiliteringsteam

Då eg var nyutdanna jobba eg fyrst i ein større bykommune, men her i Time er det kortare veg mellom meg og leiarane, og forholda kjennest litt nærare. Eg vart ikkje kasta rett uti alt med det same, eg fekk sjansen til å gjera meg litt kjent både i kommunen og på arbeidsplassen, men samtidig følte eg at eg var ein del av teamet med ein gong. Og så elskar eg å jobba med rehabilitering. Då får eg vera med folk frå dei er veldig langt nede, og til dei kjem opp på eit nivå som gjer at liva deira blir mykje enklare.