Ti turar i Time 2025: Tur 5, Bursfjell Jan Oskar Haugen

Bursfjell

Fottur, 8,6 km, rundløype, krevjande
Total stigning 410 m

Tilkomst

Ti turar i Time 2025: Tur 5, Bursfjell, startskilt Jan Oskar Haugen

Turen startar ved parkeringsplassen nedanfor bedriften Woodling AS, adresse Sælandsvegen 497. Der finn du òg QR-koden for å lasta ned løypa. Merk at både tur 4 og tur 5 har same startpunkt, så det står to QR-kodar her. Pass på at du lastar ned rett kode for den turen du har tenkt å gå! Sælandsfjellet er altså tur 4 (den nedste), mens Bursfjell er tur 5 (den øvste).

Turinformasjon

Turen er delvis ei rundløype med start frå parkeringsplassen, først på asfaltert veg og så over på tilgrodd grusveg i ytterkant av dyrka mark på Sjelset. Deretter følger løypa god traktorveg til skiltet i Jærbuskaret som peiker mot Bursfjell. Frå skiltet kan du følga nye raude merkepinnar som fører til ein gjerdeklyvar, og vidare over beiteområde og på traktorveg til du begynner på den bratte oppstigninga mot sjølve Bursfjellet. Det er tryggare å gå opp enn ned på denne strekninga.

Ti turar i Time 2025: Tur 5, Bursfjell, målskilt Jan Oskar Haugen

Bursfjell har ei høgde på 365 moh, og er ein turdestinasjon med flott panoramautsikt over store delar av Jæren. Frå toppen er det også mulig å gå til Ålgård. QR-koden for registrering av turen finn du på den fastmonterte stolpen på toppen av fjellet.

Som sagt er turen opp bratt, så returen frå toppen og ned følger i staden gammal merking langs den etablerte og noe slakare stien og traktorvegen ned til ein ny gjerdeklyvar, og videra til du kjem ned til skiltet i Jærbuskaret der du gjekk opp. Derifrå går du samme veg ned igjen til parkeringsplassen.

Turen kan òg kombinerast med for eksempel tur til Bjødnalia eller Blåfjellet, her er mange moglegheiter for ein fin dag.

Me håper du får ein fin tur!

Stolpejakten

I år har me teke med det landsdekkande konseptet Stolpejakten i Ti turar i Time! Du kan lesa meir om det på denne sida her hos oss, eller på sidene til Stolpejakten, men kort fortalt er det eit lågterskel-tilbod for å få folk ut på tur. Last ned appen «Stolpejakten» til telefonen din, så kan du skanna QR-kodar på stolpane langs vegen og «samla» stolpar over heile landet.

På denne turen finn du til saman fem stolpar (sjølv om han deler to stolpar med tur 4, Sælandsfjellet rundt). Du finn dei lettast ved å søka opp kartet som heiter «Ti turar i Time» i Stolpejakt-appen, men dei står på følgande plassar: Stolpen med QR-kodane med turinfo på parkeringsplassen ved Woodling, skiltet i Jærbuskaret som peiker mot Bursfjell, gjerdeklyvaren på veg opp, stolpen som markerer toppen av fjellet, og gjerdeklyvaren på veg ned igjen.

Påminningar

Her og der kan det vera husdyr på beite. Derfor legg me til fem små, men viktige påminningar for at alle skal ha glede av turtilbodet:

• Vis omsyn når du parkerer, slik at du ikkje blokkerer vegen for andre
• Respekter bandtvangen
• Lukk eventuelle grinder
• Ta avfallet med heim
• Følg kuvett-reglane viss du møter kyr når du er ute på tur