Kinosjef for Bryne Kino, Erlend Serigstad (til venstre) og direktør for Trondheim Kino AS, Arild Kalkvik, i foajéen utenfor Bryne kino. Are M. Heiseldal

I fjor vedtok eit einstemmig kommunestyre at ein var positiv til ei privatisering av drifta ved Bryne kino og gav kommunedirektøren i oppdrag å gå i dialog med private kinoaktørar for å undersøka interessa. Etter dialog med interesserte partar kom kommunen til semje med Trondheim Kino AS. 

– Me meiner dette er ei god løysing som reduserer kostnadane for kommunen, samtidig som me sikrar at det framleis vil vera eit godt kinotilbod på Bryne, seier kommunedirektør Trygve Apeland.  

Avtalen inneber ei såkalla verksemdoverdraging, der Trondheim Kino AS overtek både tilsette og kinoteknisk utstyr. Time kommune vil framleis vera forplikta på leigeavtalen med huseigar fram til 2038, mens Trondheim Kino AS leiger lokala av kommunen for ein årleg leigesum og vil stå for eventuelle investeringar i kinoen. 

Bryne kino har gode besøkstal sett opp mot plassering og storleik, og ligg på nivå med samanliknbare kinoar elles i landet. Kinoen har levert eit variert og godt filmtilbod gjennom mange år. Samtidig har det vist seg krevjande å få til ei drift i økonomisk balanse.  

– Etableringa av kinoen på torget har vore eit viktig byutviklingsgrep for Bryne, og eit godt kinotilbod midt i sentrum betyr mykje for folk i alle aldrar. Leiinga og dei tilsette ved Bryne kino har levert kvalitetskino gjennom mange år, og eg er trygg på at dette vil halda fram dersom Trondheim Kino AS tek over drifta. Som ein stor og kommersiell aktør i den norske kinomarknaden har dei betre føresetnader for å driva lønsamt og utvikla kinoen vidare enn det Time kommune har, seier Apeland. 

Trondheim Kino AS driv frå før kino i Steinkjer, Stjørdal, Kristiansund og Trondheim.