Are M. Heiseldal

Sterkt netto driftsresultat på 4,9 %

– Me har arbeidd målretta over tid for å styrka økonomien vår, og årets resultat viser at me er på rett veg. At me klarer å løfta netto driftsresultatet frå fjorårets 0,1 % betyr at god økonomistyring og tett oppfølging i omstillingsarbeidet gjev effekt, seier økonomisjef Sami Munawar.

Resultatet kjem av mindreforbruk i tenesteområda og høgare skatteinntekter samanlikna med året før. Det er òg auka inntekter innanfor vatn, avløp og renovasjon, som vil gå til å dekka tidlegare underskot i desse tenestene.

Mindreforbruk i alle tenesteområda

For fyrste gong på fleire år har kommunen mindreforbruk i alle tenesteområda, til saman 12 millionar kroner. Til samanlikning hadde kommunen i 2024 eit meirforbruk på 26 millionar kroner.

– Dette resultatet er svært positivt for kommunen. Etter fleire år med meirforbruk i perioden 2021–2024 viser 2025 at heile organisasjonen har klart å snu utviklinga. Det krev både god økonomistyring frå leiarane våre og stor innsats frå dei tilsette. Me har òg klart å tilpassa tenestetilbodet vårt til dei som treng det mest. Eg vil gje stor honnør til alle dei tilsette, seier kommunedirektør Trygve Apeland.

Effekt av målretta omstilling

Omstillingstiltaka som vart sette i gang i 2024 hadde allereie då dokumentert effekt, og utviklinga heldt fram gjennom 2025. Kommunedirektøren er nøgd med utviklinga:

– Tiltaka me innførte i 2024 har halde fram med å gje resultat. Me var på veg mot eit meirforbruk på om lag 50 millionar kroner i 2024, men det talet var halvert ved slutten av året. At me nå får mindreforbruk i 2025 viser at grepa me har teke har hatt god effekt.

– Me har framleis noko arbeid igjen for å bygga ein berekraftig økonomi , men 2025-resultatet viser at me har god kontroll. Det gjev oss eit godt grunnlag for å handtera uføresette svingingar og nødvendige investeringar framover, legg økonomisjefen til.

Nødvendige investeringar

Kommunen har halde oppe eit investeringsnivå på 200 millionar kroner i 2025, med investeringar innan helse og velferd og VA-anlegg på høvesvis 100 og 60 millionar kroner.

– Sjølv om me har vore nøydde til å stramma kraftig inn på drifta, må me framleis investera i nødvendige prosjekt innan helse og velferd og VA (vatn og avløp) etter tydelege prioriteringar. Det handlar om å sikra kvaliteten på tenestene våre, seier Apeland.

Framover

Dei to siste åra har kommunen nytta om lag 40 millionar kroner av sine sparepengar, eller disposisjonsfond, for å gjera opp ein rekneskap i balanse. Dette gjorde ei styrking av driftsresultatet i 2025 heilt nødvendig. Kommunedirektøren understrekar at dette òg er viktig i åra som kjem:

– 2025-resultatet viser at Time kommune er på rett veg. Arbeidet med prosjektet «Berekraftige tenester 2040» held fram i 2026 i tråd med vedteken handlings- og økonomiplan 2026-2029, seier Apeland.