Får du ikkje tilbod om helse- og omsorgstenester, vil vi gi deg ei skriftleg grunngjeving for dette. I svaret får du også informasjon om korleis du klagar og klagefrist. Din saksbehandlar kan hjelpe deg med å klage. Dette blir kalla ei rettigheitsklage. Ei rettigheitsklage blir sendt til Teneste og samordningskontoret som har fatta vedtaket. Saksbehandlar går gjennom vedtaket på nytt og ser om det bør endrast. Blir ikkje vedtaket endra, sender dei automatisk klagen vidare til Statsforvaltaren i Rogaland som avgjer saka. 

Dersom du er misfornøgd med ei helseteneste du får, bør du først vende deg munnleg eller skriftleg til leiar for tenesta du mottar. Ver tydeleg på kva du er misfornøgd med og kva du ønskjer endra. Når dei som utfører tenesta får klagen din, må dei undersøkje saka og endre tilbodet dersom det ikkje er godt nok. 

Fører ikkje klagen fram, må du sjølv sende ei skriftleg klage til Statsforvaltaren i Rogaland som gjer ei vurdering av saka. Får du medhald i klagen kan Statsforvaltaren starte ei tilsynssak. Avdekkjer dei feil, må desse utbetrast 

Statsforvaltaren 

Dersom du som pasient, brukar eller pårørande opplever at det ikkje blir gitt helse- og omsorgstenester eller at kvaliteten på tenestene er uforsvarleg, kan du klage. Lova skal sikre at alle får tilgang på nødvendige helsetenester og at desse er av forsvarleg kvalitet. Du kan også klage på at helsepersonell gir utilstrekkeleg eller feil informasjon, at helsepersonell bryt teieplikta eller ulovleg bruk av tvang overfor pasientar. 
Les meir om klagegangen hos Statsforvaltaren i Rogaland her. 

Får du ikkje medhald frå Statsforvaltaren, er ei siste moglegheit å klage til Sivilombodsmannen. På nettsida “om å klage” på sivilombodsmannen.no finn du meir informasjon om dette. 

Varselordninga for dødsfall og svært alvorlege hendingar 

Pasient, brukar eller næraste pårørande kan varsle Statens helsetilsyn om dødsfall eller svært alvorleg skade på pasient eller brukar som følgje av ytelse av helse- og omsorgstenester, eller ved at ein pasient eller brukar skadar ein annan. Adgangen til å varsle gjeld dersom utfallet er uventa ut frå pårekneleg risiko. Alle verksemder som yter helse- og omsorgstenester har varslingsplikt om same type hendingar. Varsla skal sendast til Statens helsetilsyn som innhentar informasjon og avgjer om det er grunnlag for vidare tilsyn i saka.  

Meir informasjon finst på https://www.helsetilsynet.no/ 

Norsk pasientskadeerstatning 

Norsk pasientskadeerstatning behandlar økonomiske erstatningskrav frå pasientar som meiner dei har fått ei skade etter behandlingssvikt i helse- og omsorgstenesta. 

Meir informasjon finst på https://www.npe.no/ 

Treng du hjelp til å klage, kan helsetenesta du er tilknytt hjelpe deg. Du kan også få råd av Pasient- og brukarombodet. Dei veit kva du har krav på og korleis du går fram for å klage. 

Pasient- og brukarombodet 

Det er 15 pasient- og brukarombodskontor fordelt over heile landet. Tilsette ved ombodskontora svarer på spørsmål om kva rettar pasientar, brukarar og pårørande har. Pasient- og brukarombodet bistår i klagesaker og deltek også i dialogmøte mellom pasientar, brukarar og helsetenestene, både dei kommunale og på spesialistnivå. Du kan kontakte ombodskontora både via e-post, telefon eller brev. Meir informasjon om ordninga finn du på www.pasientogbrukerombudet.no og helsenorge.no. 

Pasient- og brukarorganisasjonar 

Det er mange pasient- og brukarorganisasjonar som hjelper medlemmar og andre med rettleiing og klageformulering. Det finst blant anna ei oversikt over desse på https://profesjon.no/brukerorganisasjoner/ 

• Lov om pasient- og brukerrettigheter – Lovdata.no. 
   
• Helse- og omsorgstjenesteloven – Lovdata.no. 
   
• Pasient- og brukerombudet